short notes

 

درہم و دینار کی حقیقت

امام ابن کثیرؒ فرماتے ہیں کہ دینار دو الفاظ پر مشتمل ہے ، دین اور نار ۔

دین کا معنٰی تو واضح ہے مذہب ، عقیدہ وغیرہ ، اور نار کا معنٰی آگ ہے ۔

فرماتے ہیں من اخذہ بحقہ فھو دینہ ، جو دینار کو حق اور جائز طریقے سے حاصل کرتا ہے ، وہ اس کے لیے دین بن جاتا ہے ، اور جو اس کو باطل طریقے سے حاصل کرتا ہے ، وہ اس کے لیے آگ بن جاتا ہے ۔

گویا دینار کے لفظ میں حق و باطل دونوں پہلو مضمر ہیں ۔ اگر کمائی حلال طریقے سے کی ہے اور جائز ضرورت پر خرچ کیا ہے تو یہ اُس کے لیے دین بن گیا ، اور اگر اس کا الٹ ہے ، تو یہی اس کے لیے دوزخ کا باعث بن گیا ۔

فرماتے ہیں کہ جس طرح دینار دو الفاظ کا مجموعہ ہے ، اسی طرح درہم بھی دو الفاظ سے بنا ہے ، یعنی در اور ہم ۔ در کا معنٰی بہانا یا زیادتی ہے ، اور ہم کا معنٰی غم ہے ۔ اسی طرح درہم کا معنٰی ہو گا غم کا باعث یا غم کو زیادہ کرنے والا ۔

یعنی مال و دولت بظاہر بڑی پر کشش چیز ہے ، مگر حقیقت میں یہ غم کا باعث بنتی ہے ، اس کی وجہ سے اکثر مصائب آتے ہیں یا مشکلات میں اضافہ ہوتا ہے ۔

حضرت شیخ سعدیؒ فرماتے ہیں کہ درہم یعنی مال و دولت ایسی چیز ہے کہ اگر میسر نہ ہو تو بھی انسان غم میں مبتلا ہوتا ہے ، اور اگر مل جائے تب بھی ہر وقت غم و فکر میں لگا رہتا ہے کہ فلاں کام کرنا ہے ، فلاں رہ گیا ہے “

افادات : مفسر قرآن حضرت مولانا صوفی عبد الحمید خان سواتیؒ

معالم العرفان فی دروس القرآن ج ۴ ص ۲۴۸